Honorabel Miembronan di Parlamento,

Referente: Suministro defisiente di koriente dor di Aqualectra

Organisashon Pro Akshon pa Kalidat Duradero (OPAKD) a keda funda 10 di yanüari 2017 ku e meta pa urgi Gobièrnu di Kòrsou pa hasi un investigashon den Aqualectra i pa pèrkurá den un término kòrtiku pa solushon di suministro di koriente frekuente, stabil i duradero, despues ku a nota ku un biaha mas den vários bario na Kòrsou koriente ta kai afó mas ku normal (sistema di schakel). E situashon en kuestion ta perdura pa basta aña, sin splikashon i solushon konvisente, pues a yega e momento pa Gobièrnu karga su responsabilidat komo akshonista mayoritario, pa traha riba solushon rápido i definitivo ku ta garantisá suministro di koriente stabil i duradero pa tur kliente legal ku ta paga. Ta hopi kas di famia i tambe establesimentu a bira víktima sin ku tin oido pa nan problema.