Referendum Limpi Awo

Guiá pa determinashon idealista a desenmaskará hipokresia di esnan ku a hòrta sèn di nan mes pueblo p’asina, den un kampaña di mentira, malusá nesesidat di e yu di Kòrsou den mester pa entregá nos outonomia.

Gaña hende pober pa haña su sosten a para bira manera un deporte den e pais aki. Esei ta loke a sosodé ku e referèndem di 2009. Unda e frishidèrnan yená a keda? Unda e prosperidat a keda? Lokual nos tin ta un Banko Sentral kompartí, den nubia di korupshon, den kua Kòrsou tin un parti di 70 %, pero solamente mitar di e votonan pa disidí. Un instituto ku ademas un figura dudoso na kabes sin ku polítika ta aktua.

Un Prokurador General kompartí, di 3 pais, sin ku ningun hende den e pais aki por bisé nada den niun kaso. E ta mas poderoso ku nos Minister di Hustisia, nos Promé Minister, nos gobièrnu kompleto i nos parlamento pareu.

Un pais sin kòntròl riba su finansa.

Esaki ta resultado di e referèndem di 2009 korumpí.

Ata nos mará tòg na hustamente esnan ku a vota na otro isla ku no ke tin nada di aber ku nos i, pió ainda, den un posishon muchu mas desbentahoso ku Ulanda i Aruba ku ta den e mesun reino. Nan si tin nan mes Banko Sentral i nan mes Prokurador General bou di solamente nan mes Minister di Hustisia ku mester responsabilisá su maneho den nan mes parlamento, na moda ku nan pueblo si por ehersé kòntròl riba e institutonan di pais importante aki. Esei ta demokrasia i no e porkeria pa kua e koruptonan a bende nos outonomia na 2009.

Awor ta ora pa nos mes responsabilisá e outornan intelektual di e ladronisia di e sènnan públiko i nos outonomia, pasobra Ministerio Públiko lo no persiguí esnan responsabel pa e robo aki, ya ku nan ta pertenesé na e grupo di esnan ku ta kere ku yu’i Kòrsou mes no por nada sin Ulanda i ta p’esei nan a bende loke ta di nos.

A sobra nos solamente un arma, i esei ta un ola i movementu masal di protesta. No por entregá prinsipio di un estado di derechi. Pues, nos kousa ta unu sagrado. Awor mas ku nunka. E echonan di 2009 ta demonstrá e nesesidat pa un moveshon patriótiko fuerte.

P’esei nos mester para huntu atrobe pa lokual ta di nos. Es ku malusá nesesidat di su pueblo na lugá di proteh’é kontra un abusador ku a bin ta kometé inhustisia.

No liga e movementu di pueblo aki ku niun partido polítiko, pasobra e asuntu aki ta di pueblo i no algu di polítika partidista. Tur siudadano di tur organisashon ta bon bini pa sostené e kousa di NO pa yuda nos pueblo yega na un Kòrsou ku su podernan i institutonan den su mes man.

Keda pendiente p‘e marcha di 17 di ougùstùs binidero pa eksigí un referèndem limpi. Biba Kòrsou. NO tur dia.